Die Grumbeer

 
Die Grumbeer isch doch werklich wert,
Daß mer se genau erklärt.
 

Im Friehjohr werd sich abgerackert.
Do werd de Bode rumgezackert,
Dann werd er widder glatt geeggt
Unn dann die Grumbeer nei' gesteckt.
Was mer for nemmt ? Wie soll ich sage ?
Am beschte mit so große Aage,
Ganz loßt mer selli, klee wie Glicker,
Die größ're schneid' mer als in Sticker.
Mer macht e Loch mit Hack unn Finger -
Bauf - nix wie nei' mit denne Dinger,
Nor immer eeni in ee Kaut,
Damit's de Bode aa verdaut.
Die Aage missen owwe druff,
Sunscht geh'n se später als nit uff.
Mer schaufelt zu dann widder glei' -
O liewer Gott, steh uns bei !

De Rege kummt, es scheint die Sunn',
Mer merkt gar ball de Sege schun.
Vier Woche druff aus alle Ritze,
Do kummen scheene, griene Spitze,
Unn ziecht mer's noch e bissel naus,
Do guckt e ganzes Stöckel raus.
En Haufe Ukraut hot's jetz, meen ich,
Unn 's Land werd drucke, fescht unn steenig,
Do heeßt's jetz dapper agepackt
Unn fescht gehäufelt unn gehackt,
Dann im e lucke, sauw're Bode
Dhut alles besser noch gerote.
Die Erwet isch nit umesunscht -
Im Summer zeigt sich erscht die Kunscht:
Dann stehen scheene Bliete do
Unn 's ganze Feld glänzt weiß unn bloo.

De Bauer rechnet sein Profit:
Helft unser Herrgott weiter mit,
Dann kammer 's Spätjohr sicher denke,
Daß dicke Dinger drunne henke.

Jetz awwer bei, ihr liewe Knecht,
Unn hackt emol enunner fescht -
Herrjeh, was sinn des große Bolle,
E halwes Pund wiegt jeder Knolle!
Des isch e Grumbeer -ei - ei - ei !
E Haufe Mägd, die kumme bei,
Unn lesen se aus all dem Dreck
Unn stoppen se in große Säck.

Dann kummt e Fuhrwerk, lad se nuff,
De Bauer hockt sich owwe druff,
Unn hü ! ihr Gäul - jetz awwer schnell -
Nei' in die Stadt geht's uff der Stell.

De Städter tragt se in de Keller
Unn zahlt se glei uff Mark unn Heller,
 

De Bauer awwer dhut sich kratze
Unn rechent nooch die viele Batze,
Dann leischt er sich en ganze Schoppe
Vum allerbeschte Pälzer Troppe
Unn peitscht unn knallt dann uff sei'm Wagge,
Daß alle Leit fascht missen lache.

Grumbeere - ach, du liewer Gott -
Wer jetz genunk im Keller hot,
Der braucht gewiß nimmi zu klage
Unn kann vun Glick unn Sege sage !
Grumbeere, ach, do kammer mache
En Haufe scheene, feine Sache !
Mer kann se dämpfe, broote, quelle,
Mer kann se mit Gemies uffstelle,
Mer kann draus feine Küchle backe,
Die wu mit Obst so herrlich schmacke,
Unn wer's noch besser will versuche,
Der macht sich Grumbeerpannekuche.
Hernod den scheene Specksalat -
Och, des isch doch e wahrer Staat -
Mit Schinke, Broote odder Worscht -
Uijeh, do gibt's en Haufe Dorscht !
Dann g'schöppte Knöpp mit Butterschmalz -
O heilig, tropst emm do de Hals !
Dann "hoorige" aus rohe Sticker,
Mer heeßt se aa noch Magedricker,
Mit Hasepeffer owwedriwwer -
Do laafen eem die Aage iwwer !
O Pälzer Grumbeer, schmackscht du fei' -
Guck, uhne dich könnt ich nit sei !
 

"Ihr liewe Kinner", sagt die Mamme,
"Gell, legt emol die Händle z'amme
Unn bet e jedes laut mit mir:
O guter Gott, wie dank ich dir !
Ach, loß uns arme Pälzer Leit,
Die Grumbeer doch zu jeder Zeit !"

 
Gedicht und Bilder aus Ludwig Hartmann -
Kinnersprich vum Ludewig
1920 - Verlag E. Weinhold
 

zurück