Mei' Herzerweiterung

 
Ach was hat die Palz for Mädcher!
Nächscht so sieß wie Zuckerbreedcher;
Alle Sorte, kleen un groß,
In mei' Herz gehn all enin.-
Ob se dick sin oder dinn:
Han ich in mei' Herz geschloss'.

Doch am Liebschte vunne all
Sin mer doch uf jede Fall
Die mit blonde Hoor am Kopp
Worscht, ob Zwiwwel oder Zopp;
Die mit blunde Löckelcher
Han so liewe Bäckelcher,
Han so sieße Kerschelippe,
So for Kißcher drufzuschwippe.
 

 
Aach an die mit schwarze Hoor
Han ich oft mei' Herz verlor,
Weil sie ebbes an sich han,
Wo ich halt nit annerscht kann.
Ach, ihr Aage sin so groß
Un so locker un so los
Un mer werd vor Lieb meschugge,
Wammer do enin dut gucke
Un ich mecht se all umhalse,
For um Kiß enuf zu schnalze.
 

 
Awer die mit rote Berschte
Lieb ich glaab am allermehrschte,
Dann ehr Backe si so rund
Un so fescht un so gesund
Un 'es Kisse schmackt so gut,
Daß mer schier mei Maul als Blut.

Was ich awer erscht die Braune
Geere han, do muß mer staune.
Nee! So luschtig sin die so
Un so munterche und froh
Un so hortig uf de Fieß
Un sie babbele so sieß
Un ich krie' vor Lieb die Kränk,
Wann ich an die Braune denk.

Korz un gut! E jedi Sort
Kummt in meiner Bruscht zu Wort,
Un gäbt's noch - karierte Hoor,
Hätt ich aa noch Platz defor.
 

  
Gedicht und Bilder aus Paul Münch -
Mei' Herzerweiterung.
Feldpostausgabe, Kaiserslautern, Dezember 1940