|
Mei Herz, du bollerscht so, was werschde
Dann gar so wild als wollschte de berschte
Vor lauter Glick? Gell, du muscht lache,
Weil ich jetzt will e Versche mache
Uf so e goldig Pälzer Mäd;
Gell, Herz, das macht dir arig Freed?
Ei jo! 's is awer a e Staat,
Was unser Palz for Mädche hat!
Die Gretchen, Kattcher, Lischer, Bincher,
Die Lencher, Bettcher, Evcher, Stincher,
Wer do noch kalt bleibt, seller Mann,
Der muß kee Herz im Bussem han.
's is wohr! mit so 're Pälzer Fraa,
Do is mer glicklich sei Lebda',
Weil jedes echte Pälzer Mäd
De Haushalt tadellos versteht
Un weil se ehm, so öft's ehm schmackt,
Die Leinspeis kocht, brot oder backt,
Wann's sin muß, alle Da' Pastetcher;
Korzum, 's sin Perle, unser Mädcher.
Drum komme als aus weite Länner
In unser Palz die Weiwerkenner
Aus Östreich, Spanie, Rußland, Pole,
For in de Palz ehr Fraa ze hole,
's is, wann ich recht weeß, ungefähr
So zwee e halb Johrhunnert her,
Do war im Heidelberger Schloß
E Mädche, hibsch als wie e Ros'
Un lieb un nett un froh un flink
Un kuschtig wie e Dischtelfink,
E herzig bravi, liewi Krott!
Un das war Palzgrafs Liselott.
Un an sell Mäd hat siche Ferscht
Vum Ausland heemlich angeperscht.
'esLiselott hat awer dene
Verehrer nit verbutze kenne.
Ehr Vadder awer hat gesa't:
"Der werd genomm! Dann unser Staat,
Der brauch e Heiratsbolidik,
Weeß Gott! Du machscht de Palz ehr Glick."
Do hat das Mädche sich bezwung
Un 's Opper for ehr Palz gebrung.
'em Liselott hat's awer ball
Im Ausland gar nit recht gefall,
Weil dort die Mannsleit, Fraa un Kinn
So annerscht wie mer Pälzer sin
Un weil die Weibsleit dort ze Lann
Vun Pälzer Kich kee Ahnung han. |
|
Ja - scheene Hit un scheene Kleedcher!
So sinn emol die Auslandmädcher!
Vum Koche is kee Red bei dene,
Dann wer nix lernt, der kann nix kenne.
Do sa't die arem Liselott:
"Nee, das is doch e Sind un Spott!"
Un hat ganz schrecklich Heemweh krie't
Un war ganz traurig im Gemiet.
Un an ehr Schweschter un ehr Dante
Un an die annere Verwandte
Hat se als lange Brief geschribb:
O wär ich do dehem geblibb
Un hätt e Pälzer Mann genomm,
Do wär ich nit ins Unglick komm!
Ach niemols werr ich glicklich hie!
Es war halt e Vernunftpartie!
Du liewer Gott! Was sehn ich mich
So oft no' uns'rer Pälzer Kich,
Dann echte Pälzer Pannekuche,
Die muß mer umesunscht hie suche;
Ach! Un wie groß wär erscht mei Freed,
Wann's hie als Knackwerscht gewe dät
Un Lewerknepp wie in de Palz,
Scheen knuschperig geback mit Schmalz!
O jeh, was han im Ausland doch
Die Weibsleit for e wiescht Gekoch!
Nix als wie Gutsel un Geschleck,
Tee, Schokolad un Beeredreck
Un lauter sieß un babbig Zeig,
Das rumeniert eh jo die Baich!
Wann ich als an die Palz tu denke,
Do muß ich als mei Köppche senke
Un muß als greine heeß un bitter:
O Palz, ich siehn dich nimmi widder!
So hat die arem Fraa noch viel,
Viel Brief geschribb vum selwe Stil:
Aus dene Brief, do werd's ehm klar,
Was das e lieb, brav Weibsbild war,
Grad so wie all die hibsche Kinn,
Wo aus de Palz gebertig sin.
* * * * * * *
Drum macht die Pälzer Mädcherass'
Mer kolossal viel Freed un Spaß
Un 's dut mer leed, daß jeder Mann
Nor immer eeni nemme kann,
Dann 's wär doch werklich gar zu nett,
Wann ich so sechs bis siwwe hät.
|