Vum Camping

 
Wann in unserm schäne Mai,
All die kühle Nächt vorbei
Un 's werd werd widder wärmer,
Dann ziehen los die Schwärmer,
Dann, es isch widder Camping-Zeit,
Camping, Camping, liewe Leit,
Camping isch de Schrei der Zeit.

's Auto werd zurecht gemacht,
Do kummt nei e ganzi Fracht.
Vollgestoppt isch's bald zum Platze,
Mit'm Zelt un Luftmatrazze,
Mit Koffer, G'scherr un Decke,
Mit Häffe un Bestecke.
Konserve, Butter, Worscht un Käs,
Klappstühl un Tisch, for so e Räs,
Dann en Gasthof braucht mer nit,
Camping, häßt de neuschte Schnitt.

E schänes Plätzel, wu am Wald,
Des gibt dann de Ufenthalt,
Wie's die Zigeuner als gemacht,
Des werd heut als schän betracht.
Do werd des Zelt dann uffgebaut,
Matrazz un Decke drinn verstaut,
Tisch un Stühl wer'n uffgestellt
Un des isch dann die schäne Welt.

D'Mutter dhut schun 's Esse koche,
De Foxel zerrt schun an em Knoche
Un de Vatter pumpt d' Matzazze uff,
Do legt mer sich dann owedruff.
Jetzt kummt die Nacht, mit ihre Reize,
In de Bäm, do hört mer Käuze.
Nä, mer dhut sich doch nit täusche,
Do sin allerhand Geräusche.

Es wusselt un es zawelt,
Esch raschelt un es krawelt,
Dann hott's Schnooke noch un Motte,
Üwers Lager kraweln Krotte,
Ach Schlange hott's un Salamander,
Do krawelt alles durchenander.
Ach Ameise hott's, vun dene lange,
Die henn vorne große Zange
Un beißen als de Leit ins Bän,
Ach, was isch die Nacht so schän.

Ach Wolkebrüch sin do schun kumme,
Wu d'Matrazze fort sin g'schwumme,
Dann dhut d'Mutter lametieren,
Doher muß mich de Deifel führe,
Wu's dauern tröbbelt vun de Bäm
Un mer schäni, warmi Stubb dehäm.
Huschte gibt's un Rheimatis,
Bloß weil Camping Mode is.

 
Auszug aus "Spätles vum Bellemer Heiner"
Druck und Verlag: Pfälzer Tageblatt, Landau 1960
 

zurück